Alaitz Jauregi antzuolarrak Aitatxo, amatxo… Zergatik? ipuina kaleratu du. Luzaroan haur eskolan hezitzaile izandakoa da Jauregi eta gaur egun ere harreman zuzena du haurrekin. Hortaz, haiek irakatsitakoak plasmatu nahi izan ditu ipuin honetan; guraso nahiz helduek ikus dezaten etxeko txikiek ze ikuspuntu daukaten egunerokotasuneko egoera askotan. Gaiak anitzak dira, baina adierazi duenez, gehien bat, haurren erabakitzeko askatasuna landu du: "Batez ere haurrek daukaten erabakiak hartzeko eskubideaz aritu naiz; baina baita eurek dauzkaten sentimenduez ere. Helduok haurren lekuan jartzea nahi izan dut. Askotan guretzat oso sinplea den gauza bat, haurrentzat mundu bat da".
Haurrek irakurtzeko egokituta dago liburua, baina haurrek guraso edo heldu batekin irakurtzea gomendatu du, mezua denek jaso behar dutelako. Euskaraz nahiz gazteleraz dago testua idatzita bere helburua mezua ahalik eta jende gehienengana heltzea baita. "Ez nuen nahi euskaraz bakarrik egin. Guraso batek ez badaki euskaraz? Edo haurra gaztelaniaz hobeto moldatzen bada? Garrantzitsuena mezua iristea dela uste dut", dio Jauregik.
Bera arduratu da ipuina egiteaz; bereak dira testuak, argazkia libreak dira eta berak egin du edizioa. Liburuak duela egun batzuk argia ikusi badu ere, dagoeneko hurrengo lana darabilki esku artean. Gaia dolua izango dela aurreratu du: "Haur nahiz heldu askok dute doluaren gaia lantzeko. Askotan gai horiek tapatu egiten dira. Badakit eskolan lantzen dituztela, baina sakontasun asko duten gaiak dira".
Liburua eskuratzeko Alaitz Jauregirekin jarri behar da harremanetan 669 14 33 65 Whatsapp zenbakian, edota berarekin zuzenean harremanetan jarriz. Ipuinaren prezioa 12 eurokoa da.
