50. urteurrenaren harira, hainbat ekintza egiten aritu dira urtean zehar Arrola mendizale elkarteko kideak, eta atzo egin zuten azkeneko bat, logo berria hautatzeko bide eman baitzieten herritarrei.
Hiru aukera izan zituzten eskuartean. Guztira, 127k eman zuten euren bozka, eta diseinu berri baten aldeko hautua egin zuten 80k, Oier Peñagarikano Arrola mendizale elkarteko kideak jakinarazi duenez. "Logotipo berriko lehenengo mendiak, Arrolaren 'a' hizkia adieraziko luke, eta bigarrenak, 'm' hizkia irudikatzen du". Haren arabera, bazen aukeren artean lehengo logoarekin zerikusia izan zezakeen bat, baina herritarrek berrikuntzaren alde egin dute. "Sorkuntza berri bat da. Zerotik irten da. 50. urteurrenean komunikatiboki eta estetikoki salto kualitatiboa eman dugu, eta ezin ginen itzuli lehengo markara".
Beraz, jakinarazi du asmoa dutela irudi berria urtarrilaren 1etik aurrera erabiltzeko, eta hori bera izatea Arrola elkartearen "kolorea, forma eta marka korporatiboa jantziko" duena.
Arrolako materialaren zozketa
Bozketan parte hartu zutenen artean, Arrolako materiala ere zozketatu zuten. Kamiseta eta kantinplora eskuratu zituzten lau herritarrek, eta bik, kamiseta.
Oier Peñagarikano Arrolako kidea, mendizale elkarteko irudi berria eskuetan duela.