Antzuolako jolasguneen gaineko parte-hartzea abian da

Maider Arregi 2021ko mar. 3a, 14:40

Antzuolarrei nolako jolasguneak eduki nahi dituzten, eta egun nola ikusten dituzten galdetzen dihardu udalak. Herritarrek iritziak plazan jarrita dagoen mahaian utzi ditzakete. Orain arte, harrera ona izan duela ekimenak azaldu du Beñardo Kortabarria alkateak eta 80 bat herritarrek jada plazako edukiontzian euren balorazioa utzi dutela dio. Aurrez, ordea, Pausoka, Idolaz eta Landatxoperekin batu da proposamena aztertzeko Udala.

COVID-19ak eraginda, Udalak ezin izan du ohiko parte-hartze prozesua egin eta Udalak landutako proposamena herriko hainbat eragileekin partekatu du (Idolaz, Landatxope eta Pausoka). Ondoren herritarren iritzia jasoko du berriro eragileekin aztertzeko.

Zortzi jolasgune ditu egun Antzuolak eta antzuolarrek gune horien garbitasuna, mantenua edo egokitasuna baloratuko dute, besteak beste. Baina herritarren nahiak jasoko dituen bigarren atal bat ere badu galdeketak. Hala, askotariko ekarpenak jaso dira orain arte: tirolina, paseatzeko gune gehiago, pumptrack parkea edo rokodromoa daude, besteak beste, eskaeren artean.

Herriko Plazan jarrita dagoen jolasguneen gaineko galdeketa martxoaren 17ra arteko epean bete dezakete antzuolarrek. Ondoren ondorioak aterako ditu udalak, eragileekin partekatu eta denon artean erabakiak hartuko dituzte.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak