Antzuolan egindako aurkezpenean adierazi dutenez, 20 dira larriki gaixo dauden euskal preso politikoak eta haien artean aurkitzen den Eltzikorta antzuolarraren egoera salatu dute: "Eltzikorta gaixotasun larri bati aurre egiten ari da, Eltzikorta-ren eskubideak urratzen ari dira, gaixotasun eta zaintza baldintzak ez dira legeak dioen bezala betetzen ari, Eltzikorta-ren bizi baldintzak gaixotasun baldintzak dira zoritxarrez".
Ekintza ugari
Hain zuzen, gaixo dauden euskal presoek jasaten duten egoerari presentzia emateko asmotan hainbat ekintza antolatu dituzte azaroan zehar Antzuolan: "Azaroaren 19an, Olaranen, Fernando Arburua izango dugu Jaiki Hadi errepresentatuz, hizlaria eta gaia gaixotasunen tratamendua eta zaintza kartzelan izango dira. Bestalde, azaroaren 23tik abenduaren 1era arte, erakusketa antolatu dugu. Bertan preso eta preso ohiek egindako lanak izango dira ikusgai".
Abenduaren 1ean ere Joxe Mari Carrere ipuinak kontatzen izango da herrian, arratsaldeko 18:30ean. Adin guztietara zuzendutako ekintza izango da eta tartean Eltzikorta-ren ipuin bat ere kontatuko du.
Bailara mailako ekintzak
Herri mailan antolatu dituzten ekintzez gain, Azaroaren 29an, Sarek bultzatuta zenbait ospitaletara bertaratzeak egingo dituztela azaldu dute: "Anbulantzia bat ari da Euskal Herriko txoko denetara iritsi nahian, preso gaixo larrien egoera salatuz eta hauek etxean behar dutela zabalduz. Azaroaren 29an, bailara mailan agerraldiak egingo dituzte; Eibar eta Mendaron egon ostean, ordu batean Arrasateko ospitalean izango dira. Anbulantzia honek presentzia izango du Antzuolan egingo den manifestazioan".
Hain zuzen hurrengo egunean, azaroaren 30ean, Ez dot Moztuko bizarra eta Sareren deialdiari jarraiki bailara mailako manifestazioa egingo dute Antzuolan, Larriki gaixo dauden presoak etxera, Eltzikorta etxera lelopean.