Biela y Tierra izena du beren proiektuak eta helburua elikadura burujabetza oinarri duten eta dagoeneko funtzionatzen duten proiektuak ezagutu eta hauen berri ematea da. Hori dela eta, Darsena Estudios enpresako kideen laguntzarekin, ibilbideko proiektuetako protagonistak elkarrizketatu eta euren lanaren berri ari dira ematen web orriaren bitartez.
Biela y Tierra proiektuak lau oinarri nagusi ditu: agroekologia, elikadura-subiranotasuna, ekofeminismoa eta azkenik mugikortasun jasangarria. Izan ere, Santidrian eta Caballeroren esanetan "elikadura gizarte aldaketaren motorra da eta bisitatzen ari diren bezalako proiektu alternatiboak dira egun gizartean ditugun arazoen konponbidea".
Bi aktibistek elikadura burujabetza oinarri duten 130 proiektu bisitatzeko asmoa dute eta Antzuolako Pikunieta baserria euren 86.proiektua izan da. Josebe Blanco, Pikunietako baserritarrak dio hasiera batean harriturik jaso zutela deia baina proiektuaren berri izan orduko oso interesgarria eta beharrezkoa iruditu zitzaiela.
Ibilbide luzea egina badute ere aurretik, denera 2.500 kilometro egitea aurreikusten dute aktibistek, beraz, urriak 5a bitarte martxan izango dira eta guztiaren berri emango dute www.bielaytierra.com webgunean.