Herri Eskolaren proiektuaren jarraikortasuna bermatzeko proposamena egin du EH Bilduk

Hezkuntza munduan Antzuolako eskola erreferentzia bilakatu dela azpimarratu du Rebeka Uberak, eta funtsezkotzat jo du irakasleriaren egonkortasuna ziurtatzea proiektuak aurrera egin dezan.

EH Bilduk legez besteko proposamena aurkeztu du Legebiltzarrean Antzuolako Herri Eskolaren proiektuaren jarraikortasuna bermatzeko. Izan  ere,  Rebeka Uberak ohartarazi du "hezkuntza munduan eredu eta erreferentzia bilakatu den proiektu hori sortu eta urteetan garatu duen belaunaldia jubilatzear dago eta horrek proiektua bera kolokan jar dezake".

Hezkuntza sailari eskaera

EH Bilduko legebiltzarkideak funtsezkotzat jo du irakasleen egonkortasuna ziurtatzea proiektuak aurrera egin dezan eta, hortaz, eskari zehatza egin dio Hezkuntza Sailari, "Antzuolako ikastetxean bertan prestatu diren irakasleek aukera izan dezatela ikastetxean geratzeko". Uberak azaldu duenez, "lanpostuak betetzeko sistemaren ondorioz, irakasleak ikastetxez ikastetxe ibiltzen dira urtero, eta behin-behinekotasun hori hondamendia da Antzuolakoa bezalako eskola batentzat, ia ezinezko egiten duelako bertako hezkuntza proiektuari jarraikortasuna ematea, irakasleen aldetik ere etengabeko prestakuntza eskatzen duelako. Antzuolakoak bezala, proiektu aitzindari eta berritzailea duten ikastetxeetan, edota errealitate sozial konplexuei aurre egin behar dietenetan, irakasleen egonkortasuna ezinbesteko baldintza da hezkuntza proiektuak sendotzeko, eta kasu horietan jarraikortasun hori bermatzea dagokio Hezkuntza Sailari".

Horren ildotik, EH Bilduko legebiltzarkideak gogora ekarri du "Hezkuntza Sailak ere erreferentziatzat daukala Antzuolako Herri Eskola eta makina bat eragile, nazioartekoak ere, bideratzen dituela bertara haren metodologia berritzaile eta aitzindaria ezagutzera eman eta partekatzeko". Hori dela eta, "proiektu horren biziraupena bermatzea derrigorrezkoa da, ezin dugu onartu hainbeste urtetako esfortzua eta dedikazioa zakarrontzira botatzea".

Erlazionatuak

Nora Legorburu: "Hezkuntzako hainbat talderekin berba egingo dugu"

Antzuola

Antzuolako Herri Eskolako pedagogiaren jarraikortasuna zalantzan dago; izan ere pedagogiaren sortzaile eta sustatzaileak izan diren irakasleen gehi...

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.