Iñigo Martin, Mikel Arenas, Dani Pedraza eta Edu Roman dira Zumantzu Team taldearen bultzatzaileak. Aurten, laugarrenez antolatu dute Antzuolako irrati-kontrol bidezko autoen topaketa.Domekan, ekainaren 16an, egingo dute topaketa eta egun osoz erakustaldiak eta modalitate ezberdinen arteko lasterketak egingo dituzte Beheko Au-zoko kanpo beltzean. Edu Roman da antolatzaile taldeko kideetako bat eta dena gertu dutela azaldu du. Zaleendako bi gune prestatu dituztela dio: "Gune batean autoendako zirkuitua jarriko dugu; bigarren gunean, berriz, 4x4 autoendako –krauler modalitatea– ginkana prestatu dugu".
Eta antolatzaileek dei berezia egin gura diete autoa etxeko ganbaran dutenei: "Zaletasuna azaleratu gura dugu, eta etxeko ganbaran autoa gordeta dutenak animatu".
Hastapenerako autoak
Umeendako eta hasiberriendako, aldiz, RTR (Ready to Run) deritzoten autoak aukera ona direla dio Romanek: "Auto gogorragoak dira eta ez dute hainbesteko abiadurarik hartzen; or-dezko piezak merkeagoak dira, eta irrati parametroak aldatu egin daitezke. Trebetasuna behar da; beraz, gomendatzen dut hel-du batekin hastea. Umeendako 4x4 autoa gomendatzen dut; nahiko gogorrak dira eta edozein lekutan erabili daitezke".
Elkartasuna helburu
Topaketaren helburuen artean, esan moduan, zaletasuna sustatzea dago. Baina, aurten ere, iaz bezala, helburu nagusi bat badute, eta elkartasunez blai datorrena gainera. Hala, bi irrati-kontrol auto zozketatuko dituzte eta batzen den dirua Bergarako Fundame elkartearendako, muskulu-atrofia espinalari aurre egiteko lanean dabilen elkartearendako, izango da. Txartelak salgai daude Xinkonan eta Gorosti eta Mox tabernetan euro baten truke.
Egun osoko egitarau borobila
Hamarretan, emango zaio hasiera topaketari. Eguerdiko ordu biak arte kanpo beltzean ibiliko dira bi zirkuitu ezberdinetan irrati-kontrol autoak. Ondoren, atsedenaldia egingo dute eta berriro arratsaldeko lauretan ekingo diote bigarren saioari.Arratsaldeko seietan, berriz, bi irrati-kontrol autoren zozketa egingo dute.
