Urtea korrika egiten bukatzeko helburuarekin hasi ziren San Esteban krosa egiten Antzuolan. Laugarrenean ere kaleak korrikalariz eta animatzailez bete zen. Herri barruko lasterketa izan zen. Laburra, baina gogorra.
Nagusien lasterketan bost kilometroko ibilbidea egin behar izan zuten. Hasieratik bukaerara lasterketa buruan egon ziren Fernando Nogales eta Ibai Larrea, gazte antzuolarra. Lehenengo eta bigarren lekuetan sailkatu ziren, hurrenez hurren. Emakumeetan Esther Eskisabelek markatu zuen erritmoa hasieratik, eta ez zuen areriorik izan lasterketa osoan zehar. Eta korrikalari azkarrenen atzetik, gainerako guztiak. 110 korrikalari. Norbere erritmoan, banaka, binaka edo taldeka. Bereziki, kuadrillen kopuruak egin du gora arten.
Umeak, ere bai
Nagusien lasterketaren aurretik, txikienen txanda izan zen. Txikienak bost urtekoak izan ziren. 5-8 urtekoek egin zuten distantziarik motzena. Benjaminak, alebinak eta infantilak plazatik irten eta plazan bukatu zuten lasterketa, lagunen eta etxekoen txalo artean. Guztira, 103 umek parte hartu zuten. Bukaeran, domina bana jaso zuten opari moduan.