Mariezcurrena enpresak, martxoan hasiko ditu autobideko lanak Antzuolan. Hala, Udalak, industriagunea egiteko aukera berria sortu dela ikusi du. Izan ere, bete lanak Antzuolan bertan egiteko tokia badagoela dio Beñardo Kortabarria alkateak. Herritarrekin izan berri da Udala iritziak jasotzeko asmoz. Eta herriak industriagune baten beharra badagoela dio. EAJk ere beharra ikusten du eta proposamen interesgarria dela dio Luis Javi Telleriak.
Hazten ari diren enpresak
Mariezcurrena enpresarekin Udalak hartu-eman ona dauka. Orain baina, lehentasuna, industriagunea eraikitzeko Ingurumen sailaren baimena da.
Goizper, Elay, Matz-Erreka eta Oerlikon dira herriko lau enpresa handienak eta hazten ari direnak. Horien artean, 114.000 metro koadroko industria gunea dago egun Antzuolan. Baina, esan moduan, dagoeneko lur industrialaren beharra badute, bereziki Matz Errekak eta Elayk.
Horri irtenbide eman guran, proposatzen dena da, 21.000 metro koadroko bi plataforma eraikitzea; eta hirugarren bat egiteko aukera izatea. Udalaren planteamendua baina, garbia da: "Industrialde urbanizatua, asfaltatua, argindar eta telefono sareaz eta soilik betelanetarako lautada bat”.