"Antzuolarren beharrak ezagutu eta horiei erantzuna emateko zein urratsa eman jakiteko auzokideak gertutik ezagutzera etorri naiz. Izan ere, antzuolarrak dira Antzuolan bizi direlako", azaldu zuen aurkezpenean Antzuolako alkateak.
Sorpresa eta guzti etorri zen gainera herriko alkatea eguazteneko Auzoko saiora. "Antzuolar gutxik izango zuen ziurrenik herriko kanpandorrera igotzeko aukera. Gaur, kanpandorrera igotzeko eta bertako istorioa bertatik bertara ezagutzeko aukera izango dugu", gaineratu zuen.
Eguaztenero, Olaranen
Bi urte jada Auzoko programa martxan jarri zela Antzuolan. Maite Telleria dinamizatzaileak balorazio ona egin du. "Euskaraz hitz egiteko erraztasuna lortzen dute. Garrantzitsuena da jendeari lehen hitza euskaraz esatea, alegia", gaineratu du.
Ishor Bhudathoki nepaldarrak ere ez du hutsik egiten. Orain dela hiru urtetatik Antzuolan bizi da eta dagoeneko euskara menperatzen du: "Auzokori esker euskaraz esaldiak zuzen egiten ikasi ditut. Herriko jendea ezagutzeko aukera ere eman dit; oso pozik nago bene-benetan".
Auzoko programa herritarrei zabaltzeko asmoz, dokumentala egiten ere badabiltza. Auzotarra edo auzokidea izatea gura duenak eguaztenero Olaranen 18:00etan dauka aukera.