Eskolarteko ibilaldi neurtua egin zuten atzo, domeka, Antzuolan. Herriko plazan Arrola Mendizale Elkarteak ipinita zuen mahaian izena eman eta taldeka antolatuta 08:30ak eta 09:00ak bitartean ekin zioten mendi bueltari parte hartzaileek.
Motxilak bizkarrean eta makila eskuan bi ibilbide izan zituzten aukeran gurasoek eta neska-mutikoek. Motza 6 kilometro ingurukoa eta luzea zazpi kilometro pasatxokoa. Ibilaldi neurtua izanik ezinbesteko baldintza zen taldeek ibilbide osoa batera egitea.
Ibilbidean, besteak beste, Kaxeta, Laskuran, Akinabei, San Martzial, eta Uzarraga zeharka dituzte parte-hartzaileek. Parte hartzaile askorendako aukera polita izan da Antzuolako parajea ezagutzeko. Debatik etorritako talde honek kasu.
Antolatzaileek emandako datuen arabera 360 bat neska-mutikok hartu dute parte ibilaldi neurtuan, horietatik 60 antzuolarrak.
