Gipuzkoako Foru Aldundiko Bide Azpiegituretako Departamentuaren aurreikuspenen arabera, asteotan egiten diharduten lan horiek sei hilabete iraungo dute, eta 2,2 milioi euroko aurrekontua (BEZ barik) izango dute. Behin lanok bukatuta, Beasain eta Bergara lotuko dituen Deskargako autobidea eraiki ahalko da.
Presazko lanak
Sei hilabeteotan egin gura dutena da "lerratu ez den ezponda zatia sendotu, jausitako materiala kendu eta lurra egonkortu". Aintzane Oiarbidek Bide Azpiegituretako diputatuak gogora ekarri du "lan hauei presa ematea" izan zela, hain zuzen ere, "Foru Gobernura iritsi eta hartu zuten lehenengo erabakia. Zehazki, agindu zen karga zelulak jartzea, harri jausia gertatu zen hegalean, Bergaran, ezpondaren egoera zein zen neurtzeko eta, horrela, konpontzeko lanei ekin eta erabiltzaileen segurtasuna bermatzeko".
Autobidea eraikitzen
Behin lan horiek amaituta, Gipuzkoako Diputazioak Beasain-Durango autobidea eraikitzen hasiko da. "Aurreko foru gobernuak ez zion heldu proiektu honi, baina gobernu berriarentzat lehentasunezkoa da", adierazi dute Diputaziotik. "Horregatik, Bide Azpiegituretako Departamentua tramiteak egiten ari da, iraila hasierarako proiektu berriaren idazketa esleitzeko", gaineratu dute.
