Jaiei azken ukituak ematen dabiltza antzuolarrak

Antzuolako jaiak orpoz orpo ditugu eta horiek ere mintzagai izan dira atzo egindako osoko bilkuran. Antzuolako Udalaren eta Euskadiko Feriante Autonomoen Elkartearen arteko hitzarmena eta jaien aurrekontua izan dira jaien inguruan landutako gaiak, besteak beste.

Batetik, barraketako jabeek buelta bakoitzean kobratuko dutenaren zenbatekoa zein izango den argitu zuten. Iazko izpiritua mantenduta, 1,50 euro balioko ditu barraketako txartelak; zortzi batera erosita, 10 euro. Gainera, domekan, umeen egunean, prezioa baxuagoa izango da eta euro bakarra balioko du txartelak.

Bestetik, jaien aurrekontua zein den azaldu eta onartu zuten. Udaleko urte osoko aurrekontuan 42.000 euro daude Antzuolako Jaiei zuzenduta eta jai guztien barruan ere San Isidro eguna sartzen da; beraz, aurrekontu osotik 3.000 euro San Isidro egunerako bideratu ziren eta gainontzeko 39.000 euroak, herriko jaietarako.

Azken entseguak egiten eta autobus zerbitzu berezia

Bien bitartean, mairuaren alardeko eta larrain dantzako azken entseguak egiten dihardute antzuolarrek; izan ere, gaur eta hilaren 15ean izango dira alardeko entsegu orokorrak.

Hori horrela, aurten autobus zerbitzu berezia ere izango da jaietarako. Zumarragatik edo Bergaratik ordu erdiro egongo dira autobusak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.