Martxa onean doaz erdiguneko lur zorua konpontzeko lanak Antzuolan. Kalebarrengo zubitik Herriko Plazara arteko bideko lanak bukatu berri dituzte. Gaur berriz, Buztinzuritik gorako errepide zatiko lanekin hasi dira. Kalebarrenen bezala, zorua berdinduko dute eta galtzada-harriak jarriko dituzte.
Hala, aste pare batean, maiatza bukaera arte gutxienez Kalegoi eta Antigua auzoetara joateko errepide zatia itxita egongo da. Horregatik Zumarragara doazen autobusak ezingo dira herri barrutik pasa eta Antiguako geltokian geratuko dira jendea hartzeko. Kalebarrengo lanak amaituta dauden arren, itxita dago zirkulazioarendako.
Hirigintza teknikari Valen Moñuxek azaldu du hasiera batean lur dena jasotzea izan arren asmoa, dena ez altxatzea erabaki dela. Hala ere, gehiena jaso eta berritu egingo da. Egingo diren lanekin dena ondo kokatuta geratuko da eta ez da inolako irregulartasunik eta zulorik izango zoruan.
Bederatzi mila euroko –bez kanpo– aurrekontua dute lanok. Botatako lur berria ondo finkatzea komeni da behin lanak bukatuta; irregulartasunik gabeko zorua lortzeko ibilgailuak ezingo dira bertatik pasa maiatza bukaera arte.