Hasierako proiektutik asko aldatu den arren, azkenik, Antzuolako Zupideko biribilgunea egiten hasi da Foru Aldundia. Antzuolako irteeran, Zumarraga-Urretxurako noranzkoan, eraikiko dute biribil berria. Ima Beristain alkatea pozik dago, "horrenbeste borrokatutako" lanak egitea lortu dira-eta azkenik legegintzaldia bukatu aurretik.
Biribil horren bitartez egingo dira mugimendu guztiak bai Antzuolako herrigunean sartzeko bai herrigunetik irteteko; hau da, Bergaratik nahiz Zumarragatik joanda, herrigunean sartzeko, eta Bergararuntz nahiz Urretxu-Zumarragaruntz abiatuta, herrigunetik irteteko.
Antzuolako irteeran egongo da biribilgunea (Urretxu-Zumarragako noranzkoan) eta aldaketa handi bat ekarriko dio herriko mugikortasunari, aukera emango baitu herriguneko mugikortasun guztia egokitzeko, bai ibilgailuentzat bai oinezkoentzat. Gainera, aldaketa handia ekarriko die autobus publikoen mugimenduei, herritarren mesederako.
Aurrekontua 193.508 eurokoa da eta Otegi-Gaztañaga enpresa arduratuko da.Hamar asteko epea dute amaitzeko. Lanak oraingo errepidearen kanpoaldetik hasiko dira, zirkulazioari ez eragiteko. Ondoren, zirkulazioaren behin-behineko desbideratzeak egingo dira plataforma berritik biribilgunea osatu arte.
