"Oso pozik" eta "gustura" jaso dute albistea herriko erretiratuek. "Herri guztietan dago eta nik erabili izan ditut; semearengana joaten naizenean Gasteizera adibidez, horrelako aparatuak ibili ditut. Beharrezkoa zen", dio erretiratutako emakumezkoak.
Sei gimnasia aparatu
Guztira gimnasia egiteko sei aparatu jarrita daude. Psikomotrizitatea lantzeko dira. Gerria, eskumuturrak, besoak, hankak eta belaunak lantzeko. Probatzeko "desiratzen" daudela diote.
Olamendikoen borondatez
Ima Beristain alkateak kontatu du Olamendiko senar-emazteek Ongizate sailerako utzitako herentziari esker egin ahal izan dutela parkea. "Olamendiko senar-emazteak hil zirenean, Ongizatean gastatzeko dirua utzi zuten. Hori errespetatuz egin ditugu erretiratuendako parkeko lanak. Euren oroimenez esker-oneko plaka jarriko dugu", dio. Beharrezkoak diren hainbat material ere erosi dira –koltxoiak, oheak, ahulkiak...–. Torresoroa atzealdeko irteera ere ez da guztiz irisgarria. Hala, irteera hori ere egokitu gura du Udalak jasotako diru-partida horri esker.
