Oñatiko EH Bilduko Mahai Politikoak Iñigo Ruiz Barron proposatu du alkategai izateko, gaur Eltzian egin duen batzarrean. Barron Arkitekturan lizentziatua da, eta ULMA taldean eman ditu azken bederatzi urteak proiektu kudeatzaile lanetan.
EH Bilduren Mahai Politikoak azaldu du bere profila dela "gaur-gaurkoz Oñatik, eta, oro har, gizarteak dituen erronkei erantzuteko egokiena datozen urteetako erronkei erantzuteko beharrezkotzat jotzen diren prestakuntza, esperientzia eta udal kudeaketaren ezagutza kontuan hartuta. Ez dugu proposamen egokiagorik ikusten, beti ere, beste hautagaitza batzuk aurkezteko eskubidea eta prozesuaren irekitasuna errespetatuz”.
“Eskualdeko diagnostikoa eta etxebizitza plana garatzen lagundu du, baita Oñati gune tentsionatu izendatzeko prozedurak abiarazteko ekintza plan propioa gauzatzen ere. Ekarpen esanguratsua egin du etxebizitzaren alorrean; bide bat zabaltzen lagundu du”, gaineratu du Oñatiko EH Bilduren Mahai Politikoak.
Kudeaketaren garrantzia Udal-kudeaketan duen esperientzian ere jarri du mira Mahai Politikoak. “Orain arteko esperientziak ikuspegi zabalagoa izaten lagundu dio, eta administrazioaren egitura, prozedurak eta eskumenak ezagutzea lagungarri izango zaio lehen egunetik herritarren beharrei, herritar zein eragileekin elkarlanean erantzuteko eta udal-politikak modu eraginkorrean garatzeko; baita Oñatiko eguneroko jardunari eta epe luzeko helburuei erantzuteko ere”, azaldu dute.
