Aurreko urteetan moduan, taberna horren kudeaketa hartzen duen taldearen ardurakoa izango da zerbitzuaren hornidura eta ustiaketa osoa, eta lortutako irabaziak taldearentzat izango dira. Uztailaren 30a aurretik egin behar dira eskaerak, udal erregistroz edo kultura etxera joanda.
Hori, baina, ez da herriko jai nagusiei begira zabalik dagoen deialdi bakarra. Hain zuzen ere, Herri Egunean bertan janari postuak jarri gura dituztenek ere orain dute izena emateko sasoia: irailaren 11ra bitartean egin behar dute, udal webgunean edo Herritarren Arreta Zerbitzuan. Interesa duenaren datu pertsonalak ez ezik, zenbat metroko postua izango den zehaztu beharko da eskaeran. Postu kopuruaren arabera zozketa egingo da.
Nekazarien Elkartea, bestalde, ari da urteroko erakusketa eta lehiaketa antolatzen.
Artisau azokaren ohiko deialdirik ez
Artisau azokari dagokionez, Oñatiko Kultura Sailak jakinarazi nahi du aurten ez dela ohiko deialdi irekirik egingo. Erabaki hori Oñatiko Unibertsitate inguruan egiten ari diren obren ondorio da. Izan ere, azoka egin ohi den eremua itxita dago, eta, ondorioz, ezin da aurreko urteetan bezala antolatu.
Hala ere, Oñatiko Udala herriko artisauen azoka egiteko erabilgarri egon daitezkeen espazioak aztertzen ari da. Espazio egokirik aurkituz gero, herriko artisauentzako deialdi mugatua egingo da, erabilgarri dagoen eremura egokituta. "Sortu daitezkeen eragozpenak sentitzen ditugu, eta eskerrak eman nahi dizkiegu urtez urte azokan parte hartu duten artisau guztiei", adierazi dute Kultura Sailetik.