77 urteko artzain baten bila zebilen Ertzaintza eguenetik. Atzo egun osoa eman zuten haren bila. Helikopteroz ibili ziren Aizkorriko hegoaldeko magalean bila, eta arratsaldeko azken orduan haren artaldea eta txakurra aurkitu zituzten. Ez zegoen, ordea, gizonezkoaren berririk.
Eguna ilundutakoan bilaketa etetea erabaki zuen Larrialdietako koordinatzaileak eta gaur goizean ekin diote lanei berriro. Esperantza zen nonbaiten babesa bilatu izana, baina hamaikak baino minutu batzuk lehenago aurkitu dute haren gorpua txakurra aurkitutako tokitik gertu, Artzanburu mendiaren inguruan.
