Gazteak udalekuetan utzi eta gutxira ohartu ziren egoeraz gurasoak, gertatutakoaz kaltetutako Lorea Suarezek adierazi duenez. Ohartu bezain pronto, umeekin etxera itzultzea erabaki zuten. "Alaba udalekuetan utzi eta gutxira jaso genuen haren deia, bere bila joateko esanez. Debako aita bati esker lortu zuen telefonoa, eta aita harek eman zidan azalpena zera izan zen: eskatu zutela instalakuntzak ikustea, eta sartu zirenean barrukoak izuaren etxea zirudiela", sio Suarezek.
Aurretik Oñatiko beste talde bat izan zen udalekuetan, eta euren bitartez jakin zuten egoera ez zela onena. Hala ere, udalekuetako koordinatzailearekin hitz egin ostean "lasai" gelditu zirela dio Suarezek.
Erantzunik ez
Hainbat familiek egoera salatu ostean, Bakioko udaltzaingoa udalekua zegoen eraikinera joan zen. Egoera ikusita, etxera itzuli ziren oñatiarrak, eta harrezkero udalekuen antolatzaileekin harremanetan jartzen saiatu badira ere, ez dute erantzunik jaso: "Guk, momentuz, ez dugu erantzunik jaso. Jakin dugu familia batzuk mezu elektronikoren bat jasotzen hasi direla, baina dirua bueltan jaso arte eta eurek egin dutenaren aurkako zerbait egin arte ez gara lasai geldituko", adierazi du Suarezek.
Momentuz ez dute salaketarik jarri. Bakioko udalarekin harremanetan daude eta familia guztiek talde bat sortzea erabaki dute. Egoerari irtenbide bat bilatzeko ikerketak egiten ere badihardute, eta salaketa jarri aurretik, enpresak erantzun bat emateko denbora-tarte bat uztea erabaki dute. Egoera, “sinesgaitza” dela dio Suarezek.
Euskal Herriko komunikabideetan egoeraren berri ematen ari dira gaur egun familiak, baina Suarezek dio egoera aldatu ezean, Espainia mailako komunikabideen ateak jotzen ere hasiko direla.