Nekazarien Elkarteak antolatzen du, Udalaren laguntzarekin, Herri Eguneko goiz parteko animalien eta fruitu eta barazkien azoka, gazta lehiaketarekin batera. Aurten ere, 06:00etarako kalean ziren elkarteko zuzendaritzako kideak eta beste hainbat bazkide, Unibertsitate aurreko zelaigunera animaliak ekarri aurretik dena gertu dagoela ziurtatzeko. Ohiko espazioan egon dira abelburuak eta urterokoan barazkiak eta fruituak ere, horiek, unibertsitatearen aurrealdean jarritako postuetan. Gazta lehiaketa ere hantxe egin da, inguru horretan. Bertako, herriko, nekazariek eta abeltzainek etxean, Oñatin, hazitako, ereindako zein zaindutako produktuak izan dira aurten ere.
Gazta lehiaketara, hamalau gazta aurkeztu dituzte: Gesaltza, Aldai, Iruatz, Gomistegi, Iruatz, Erguiña, Elorrixa, Duruan, Uxarte Garaikoa, Landeta, Goiko-etxe, Txandomalduena, Kortabarri eta Iziar Goikoa. Hiru sari eman ditu epaimahaiak eta sarituak izan dira: Gesaltza, Iruatz –Felix Azkargorta– eta Gomistegi.
