Hots Abesbatzaren eta Ganbara Abesbatzaren eskutik datoz Gabonetarako Ganbara Faktoriaren bi eskaintzak. Lehena, Gaueko Andreak izeneko kontzertua izango da, Hots Abesbatzak eskainiko duen musika ikuskizuna. Proposamenak emakumea, euskal tradizioa, baserria, mitologia, sorginak, aztikeria... ditu oinarritzat eta hilaren 22an izango da, 22:00etan, Zubikoa Pilotalekuan. Honela azaldu du Aitor Biain zuzendariak: "Sorginen historia kontatzen joango gara musikaren eta narrazioaren bitartez. Jatorria, akelarreak, sorginkeria eta zapalkuntza eta inkisizioa ere landuko ditugu ikuskizunean zehar". Guztira 40 lagunek hartuko dute parte proiektuan. Amaia Zipitria arituko da pianoan, Miel Guridi narratzaile lanetan eta Aitor Biain zuzendari lanetan.
Eskainiko diren piezak osotasunean dira euskal konposatzaileek sortuak, eta, gainera, proiekturako propio egindako bi abesti ere entzun ahalko dira; Junkal Guerreroren Gaueko andreak eta Inge Conderen Gaueko, hain zuzen ere. Horiez gain, Ganbara Faktoriarendako ezagun diren David Azurza, Jabi Busto, Xabier Sarasola edo Eva Ugalde euskal konposatzaileen lanez osatuko da errepertorioa.
Rossiniren Petite Messe Solennelle, Ganbara Abesbatzaren eskutik
Bestalde, Ganbara Abesbatzak eskainiko duen kontzertua, kontzertu klasikoa izango da. Abenduaren 29an izango da, 20:00retan, San Miguel Parrokian. Maila handiko produkzioa prestatu du Ganbara Abesbatzak, Rossiniren pieza ezagunenetariko batekin. Abesbatzaz gain, lau bakarlari profesional –Ana Otxoa (Sopranoa), Lucia Gomez (Mezzosopranoa), Aitor Garitano (Tenorea), eta Juan Laboreria (Baxua)– arituko dira Parrokian, pianoaz –Amaia Zipitria– eta Harmoniumarekin –Xabier Urtasun– lagunduta.
Petite Messe Solennelle Gioachino Rossini konposatzaile italiar ospetsuaren obra bat da, bere musika-handitasunagatik eta sakontasun espiritualagatik ezaguna. Rossinik 1863an konposatu zuen lana, opera sortzetik erretiroa hartu eta denbora askora –1829an sortu zuen bere azken opera–. Petite Messe Solennelle, Rossiniren azken konposizio adierazgarriena da, bere azken urteetan idatzia eta emozio eta gogo-aldarte ugari irudikatu zituen bertan: introspekzioa, debozioa, alaitasuna eta etsipen espirituala, kasu. "Aldakortasun musikal eta emozional horrek denboraz kanpoko obra bihurtzen du eta mundu osoan estimatzen eta gauzatzen jarraitzen da", azaldu du Bianek.
Gabon Batzea, Faktoria Sozialarekin
Bestalde, aspaldiko ohitura dute Ganbara Faktoriako taldeek abenduaren 24ko Gabon Batzea. Aurten ere, kaleetan zehar ibiliko dira goiza gabon kantez girotzen. Halere, badira berritasunak, izan ere, aurten, Faktoria Soziala proiektuarekin bat eginez, San Martin Egoitzan hasiko dute kantaldia. 11:00etan hasiko dira, egoitzatik.
