Askotariko ekintzak antolatu dituzte asteburu horretara begira adin guztietako publikoarendako, egubakoitzean hasita. Halere, bi dira ekitaldi izarrak: lehena, Debagoiena lotzen duen GR 289 ibilbidearen aurkezpena eta bigarrena, apirilaren 23an, domeka, egingo den Aloñako Igoera.
Hartzaren Urratsa, Debagoiena lotzen duen medi-ibilbidea
Hartzaren Urratsa izena ipini diote apirilaren 22an aurkeztuko duten GR-289 ibilbideari. Azaldu moduan, Debagoiena lotzen duen mendi ibilbidea da eta aurkezpen egunean egongo da lehenengo etapa egiteko aukera. GR-289a Debagoiena zeharkatzen duen GR bat da, Puntai Punta Bidezidorren Jaialdiaren bueltan sortua. Gaur egun homologatuta dauden PR eta SL ibilbideen batura da. Guztira bost etapa ditu ibilbide-sareak, 20 kilometro eta 8 ordu ingurukoa bakoitza. Lehen etapa apirilaren 22an egingo da eta gainontzeko laurak hurrengo asteburuetan. "Ibilbideak natura ardatz hartuta, Debagoieneko gune turistiko esanguratsuenak lotzen ditu. Oñatiko gune historikoa Antzuola eta Bergara lotzen dituen trenbide zaharra, Bergarako Laboratorium museoa, Elgetako gerra lubaki eta babestokia, Arrasateko Udala auzoa, Urkulu, Aitzorrotz, Leintz Gatzagako Gatz Museoa, Araotz eta Arantzazuko Santutegia".
Aloñako Igoera, domekan
Domekan izango da aurtengo Puntaik Puntako bigarren ekintza nagusia. Aloñako Igoera, alegia. Aurten, Puntai Puntak eta Aloñako igoeraren antolatzaileek elkarlanean antolatu dute egun hori. Aloñako Igoeraz gain, senderismo azoka ere egingo da, baita bisita gidatuak turismo bulegotik, eta arratsaldean Tio Teron egongo da herriko plazan.
