Elkarrekintza sustatu eta ekintza komunitarioa indartzera begirako plataforma digitala aurkeztu du astean Oñatiko Udalak. Herriko esparru, eragile eta ekimenak ikusarazteko, hausnartzeko eta elkarrekin saretzeko "tresna kolektibo eta kolaboratiboa" da www.oñatiekintzakomunitarioa.eus webgunea eta lehen errondan ehun soziala osatzen duten antolatutako eragileak igo dituzte mapa horretara.
Mapa bizia da
Oraingoz, 102 eragileren datuak bildu dituzte mapan. "Mapa bizia da eta berriak etorriko eta sartuko dira. Edonork du aukera, edozein unetan, mapan sartzeko", dio Anik Zubizarretak, Oñatiko Udaleko Partaidetza eta Garapen Komunitarioko batzordeburuak.
Oñatiko ehun soziala osatzen duten herriko taldeen, elkarteen, kolektiboen eta eragileen topaleku izan eta haien arteko elkarrekintza sustatzea helburu duen egitasmoa ipini zuen martxan Oñatiko Udalak 2020an. Lanketa horren ostean sortu da web plataforma, elkarte, kolektibo eta eragile horiek elkarren berri izateko tresna moduan. "Zabaldu eta bistaratu, jakiteko elkarteak badaudela, zertan ari diren, nortzuk diren, non dauden... Ikuspuntu orokorra eskaintzen du mapak, herrian zer dagoen eta zer mugitzen den ikusteko. Egungo eta egon ahal den sarea ikusteko aukera bat da".
'Aulkiak-2' saioak, arloka
Guztien eskura dagoen web plataformaz harago, Aulkiak delako topaketaren bigarren saioak egingo ditu Udalak. Iazko azaroan egindako lehen topaketaren emaitzaren ondotik, arloka bilduko dira eragileak, eta elkarrekin dituzten harremanak eta elkarlanerako aukerak jorratuko dituzte. "Lehenengo saioa orokorra izan zen, hurbilpen bat, eta orain iruditu zaigu aberasgarria izango dela sektoreka egitea, eurek konpartitzen dutena azaleratzeko. Datu horiek baliagarriak dira, lanketarako kontuan hartzekoak". Hilaren 17an eta 18an eragile sozialak batuko dira; 24an, kultura eta hezkuntzakoak; eta 25ean, kirol eta ingurumen arlokoak. Euskaldun Berria gelan, 18:00etan.
