Euskarazko lanen artetik, Itziar Ugarte Irizarren estreinako poema liburuak eta Kirmen Uriberen azken eleberriak jaso dute Espainiako kritikarien aitortza. Bi liburuak Susa argitaletxeak argitaratu zituen, iaz.
Sorpresa "itzela"
Korrikaren aitzakian asteburu-pasa Baionarako bidean abiatzear zela jaso zuen Oñatiko idazleak eta kazetariak Jon Kortazar kazetariaren sorpresazko deia. "Prentsaurrekoa eman berri zutela esan zidan, eta saritutako lanen artean nire poema liburua zegoela. Asko eskertu nion aitortza hori, eta hortik aurrera nahiko surrealista izan da asteburua, jai giroan murgilduta, baina, aldi berean, mugikorra bizi-bizi, eta jasotako albistea burura etorri eta joan ibili nintzen eta", dio Ugartek.
Albistea irensten joan zen, poliki-poliki, eta eskertuta dago jasotako aitortzarekin eta, are gehiago, ondoren jaso duen mezu zaparradarekin. "Liburuarentzako bultzada bat izango da, duda barik, sari edo aitortza hori, eta niretzako ikaragarria da jasotzen ari naizen zoriontzeko mezu eta dei mordoa. Saria emateko argumenturik ez zidan eman Kortazarrek, hark ere liburua oso gustura irakurri zuela baino ez. Dei txiki batetik, bat-batean, dantza potolo bilakatu da hau guztia. Hasieran, ez nuen ondo jakin sariari neurria hartzen, baina konturatu naiz Espainiatik etorritako saria denez euskal hedabideetatik harago doala sariaren oihartzuna, eta poztekoa da hori".
Zuzeneko saioak prestatzen
Garai bat kontatzeko nahia, oroitzapenak eta deskubrimendu berriak dira, besteak beste, Gu gabe ere liburuan oñatiarrak batu dituen poemen abiapuntua eta gaiak. "Lagunarteko momentuak, bestelako giro batzuetatik eratorritakoak, harremanak, 36ko gerra, gure garaiari buruzko intuizioak, momentu txikiak... Askotarikoak dira poemetako gaiak".
Jasotako sariarekin lanean jarraitzeko ardura sentitu duela dio Ugartek. "Lagun batekin ari naiz liburua zuzenenera eramateko saioa prestatzen orain; uda aurretik emanaldiren bat edo beste egitea da gure asmoa".
