Xabier Igartua alkateordeak Natur Eskola Oñatirendako proiektu estrategikoa dela deritzo eta ingurumenaren proiektu pedagogikoarekin lotuta dagoela. Herri iraunkorra izateko ezinbestekoa dela, alegia.
Bioeraikuntzan oinarrituta
Asier Iraeta ingurumen zinegotziak azaldu du helburua eraikinarekin eta Natur Eskolaren izaerarekin bat zihoan birgaitze lanak egitea izan dela. Horregatik bioeraikuntzako teknikak ezarri dituztela nabarmendu du. Isolamenduarekin jarraituz, eraikinak teilatu berde edo bizia deritzona du. Isolamendu termiko eta akustikoa eskaintzen duena. Erabilitako materialarekin Natura ahalik eta gehien errespetatzen saiatu direla adierazi du. Hala, Eraikin honen efizientzia energetikoa ahalik eta handiena izatea da gura dena, eta komunetan ere aplikatuko dute filosofia hori. Komun lehorrak izango dira eta kanpoko putzuari esker, zikinak garbiago helduko dira errekara. Gorotzak eta ur-zikinak bereizi egingo dira gainera.
Energia berriztagarriak
Eraikuntza sistemak ere energia berriztagarrietan oinarritzen dira. Hala, biomasa bidez eta su egurrarekin funtzionatzen duen tximinia egin dute.
Argizulo berri bat ere badu Natur Eskolak erdigunean, eta modu horretan argitasun gehiago sartzen da. Harkaiztegi eder bat ere egin dute, tokiko biodibertsitatearen eta natura aberastasunaren erakusle.
Natur eskolak 30 urte
Datorren urtean, Oñatiko Natur eskolak 30 urte beteko ditu. 1992ko ikasturtean ireki zituen ateak. Orain, itxura berrituta eta erronka berriekin herritar ororendako irekita dago.
