Arantzazu berrikuntza sozialerako laborategi izango da udazkenetik aurrera

Arantzazu berrikuntza sozialerako laborategi izango da aurrerantzean. Horixe izan da, gaur goizean, Donostian egindako bileran, Arantzazu Gaur Fundazioko patronatuak, Aldundiko arduradunek eta Oñatiko Udaleko, Mondragon taldeko, Kutxa Fundazioko eta frantziskotar anaidiko ordezkaritza batek erabakitakoa. Ingurumena eta gizartegintza ardatz izango dituen proiektu eraldatzailea izango da, alegia, elkarbizitza, ongizatea, lana eta aldaketa klimatikoa langai izango dituen berrikuntza sozialerako laborategia.

Donostian egindako bileran, egitasmoa aho batez onartu dute eta Arantzazuren etorkizuna bermatzeko oinarriak zehaztu dituzte. Markel Olano diputatu nagusiak azaldu duenez, Arantzazuk "itsasargi eta bidegile funtzioa" jokatzen du euskal gizartean eta horrekin batera, frantziskotarren "eskuzabaltasuna eta ikuspegia" goraipatu ditu, "izaera herritarra eta herriaren zerbitzura lan egiteko konpromisoa" erakusteagatik.

Frantziskotarrak ere inplikatu dira egitasmo honetan, abiapuntua Arantzazuren etorkizunari buruz azaldutako kezka izan baita. Euskal Herrian oro har, santutegiak eta haren inguruak indar sinbolikoa du herritar askorentzat eta diktaduraren une gogorretan euskararen gordailu eta hizkuntza estandarraren abiapuntu ere izan da, besteak beste.

Udazkenetik aurrera

Gaurko bileran, beraz, Arantzazuren berpizkundea gauzatzeko ahalegin bat egingo dutela adostu dute. Horretarako, datorren udazkenean, berrikuntza sozialerako laborategia abian jarriko da Gandiaga Topagunean. Elkarbizitza, ongizatea, lana eta aldaketa klimatikoa aztergai eta langai gisa hartuta, Arantzazu, "gizarte gizatiarrago, justuago, kohesionatuago eta lehiakorrago" baten aldeko "erreferentzia gune" bilakatuko da.

Laborategian euskal gizarteak izan ditzakeen arazoak eta beharrak izango dira abiapuntua eta erantzun berritzaileak abiatuko dira. Horretarako, partaidetza prozesuak garatuko dira, baina baita ikastaroak, kongresuak, jardunaldiak eta hitzaldiak antolatu ere.

Erlazionatuak

Joxe Mari Arregi: "Izugarri gustura gaude Arantzazurendako ez ezik, lurraldearen zerbitzurako garrantzitsua ere badelako"

Oñati

Arantzazuren etorkizuna bermatuko duen proiektua bi urtez egosten ibili ostean, gizarte berrikuntzarako egitasmoa, ikasturte berrian abian jarri gu...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.