Aloña Mendik ohorezko erregional mailan jokatuko du datorren denboraldian

Aloña Mendiko futbol sailak berri pozgarria izan du gaur: Gipuzkoako futbol federazioak 2019-2020 denboraldia bukatutzat eman du, eta ondorioz Aloña Mendi mailaz igoko da. Ohorezko erregional mailan jokatuko dute oñatiarrek 2020-2021 denboraldian.

"Pozik gaude, oso pozik", azaldu du Aloña Mendiko entrenatzaile Endika Ruizek. Aste "luzea" izan dela nabarmendu du, "informazio askokoa", baina gaur erabakia ofizial egin denean pozik hartu dutela berria: "Nahiago genuke denboraldia zelaian amaitzea, hori izango litzateke bidezkoena; baina, pozik gaude hartu duten erabakiarekin".

Kamisetak balkoian jartzeko deia

"Egoera xelebrea" dela gaineratu du eta ondorioz, ezin izango dutela ospakizunik egin: "Oraingoz ez dugu ospakizunik egingo. Gure saria izango da datorren denboraldian ohorezko erregional mailan egotea, Aloña Mendik merezi duen tokian". Hala ere, egoerak aukera ematen dien momentuan ospatuko dutela gaineratu du Ruizek.

Futbol saileko zuzendaritza taldeak dei egin die herritarrei balkoietan Aloña Mendiko kamisetak jartzeko, eta modu horretan ospatzeko igoera.

Igoerak bai, jaitsierak ez

Martxoaren 8an eten zuten liga; bada, orduko sailkapena hartu dute kontuan ze taldek igo erabakitzeko. Orduko egoera kontuan hartuta, Aloña Mendi sailkapeneko lehenengo postuan zegoen 53 punturekin eta bigarrenarengandik 7 puntuko aldearekin. "Ohorezko erregionalean bi multzo gaude: gure multzotik gu igoko gara eta beste multzotik Allerru", dio Ruizek. Federazioak igoerak gauzatuko ditu; baina, ez, ordea, jaitsierak. Modu horretan, Antzuolak mailari eutsiko dio: sailkapeneko 15. postuan daude 20 punturekin.

Areto futbola

Aloña Mendiko areto futbol saila ere ospakizunetan dago: talde nagusia hirugarren mailatik bigarren mailara igo da.

Erlazionatuak

Bigarren mailan jokatuko du Ingou Aloña areto futbol taldeak

Oñati

Ingou Aloña areto futbol taldeak igoera lortu du eta datorren denboraldian Gipuzkoako bigarren mailan jokatuko du.
Euskal Ligarako txartela lortu du Leintz Arizmendik

Gipuzkoako federazioak liga bukatutzat eman duenez, Leintz Arizmendik Euskal Ligan jokatuko du datorren denboraldian. Andoni Ezkurra entrenatzailea...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.