Hiru saio
Hain zuzen, hiru saio izango ditu aurtengo bertsolari txapelketak. Lehen saioa martxoaren 23an jokatuko da, lehen finalaurrekoa izango dena. Txapelketa 17:30etan hasiko da, Antixena gaztetxean, eta zortzi bertsolari arituko dira: Ander Lizarralde Pertzi, Urko Egaña, Gorka Larrea Txapel, Maider Arregi, Joseba Lasagabaster, Beñat Alberdi, Bittor Zubiagirre eta Xabier Pascual Pasku. Bigarren finalaurrekoa, berriz, astebete gerogo jokatuko da, hilaren 30ean, hain zuzen ere. Eltziako topagunean jokatuko da finalaurreko hori eta bertan beste zortzi bertsolari arituko dira: Odei Irigoien, Aitor Tatiegi, Egoitz Aizpuru, Andoni Goitia, Joseba Igartua Urze, Urko Arregi, Gontzal Belategi eta Aritz Irigoien. Azkenik, eta azken saio gisa, finala jokatuko da, apirilaren 13an, 18:00etan, Oñatiko gaztelekuan. Finalean sei bertsolari arituko dira: lehen eta bigarren finalaurreetako irabazleak eta, horiez gain, puntu gehien eskuratutako lau bertsolariak.
Apirilaren 13an jakingo da edizio honetako txapeldunaren izena eta Oñatiko Bertso Eskolaren sortzaileetako bat izan den Xabier San Migel izango da irabazleari txapela jartzeko ardura izango duena. Horrez gain, txapelketan zehar banatuko diren sari guztiak Oñatiko artisau, ekoizle eta Eltziako kideek sortu eta ekoitzitakoak izango dira; izan ere, herriko eragileen arteko elkarlana bultzatu da.
Epaimahaikideak
Epaimahaikideek bertsolarien bertsoak puntuatuko dituzte, eta, horretarako, bertsozaleak diren eta aurreko txapelketetan lan hau egiten aritu diren Lander Diaz de Gereñuk, Nerea Etxezarretak eta Julen Iriondok osatuko dute taldea. Talde hau txapelketa osoan zehar arituko da eta horiekin batera Xabier Igartua izango da puntuazio zenbaketa egiteaz arduratuko dena.
Gai-jartzaileak
Mirari Sagarzazu eta Egoitz Atxaga izango dira txapelketako gai-jartzaileak. Are gehiago, finalaurreko bakoitzean bat arituko da lan horretan eta final egunean, aldiz, biak izango dira. Horiez gain, bertso eskolako hainbat kidek taldetxo bat osatu dute eta gaien lanketa egiten ari da dagoeneko. Gainera, bertsolari txapelketa hasten denetik apirileko lehen asteburura bitartean, herriko hainbat tabernatan gai kutxak egongo dira gai proposamenak aurkezteko. Finalera begira, gai-jartzaile taldeak horiek bildu, landu eta egokitu egingo ditu.
Sintonia
2012ko txapelketarako sintonia bat sortu zen eta horri jarraikortasuna emanez, orduko melodiak formatu eta modu egokian grabatu dira. Hala, asteburutik aurrera, kantu zahar-berritua entzungai egongo da txapelketako saioetan eta baita herriko tabernetan ere.
