Hiru arlotan banatu du Gislan enpresak 110 orriko txostena: diagnosi soziodemografikoa, etxebizitza parkearen azterketa eta Herrigune Historikoaren erradiografia. Hirurak aztertzeko eta ondorioak ateratzeko, hainbat aldagai erabili dituzte.
Oñatik dinamika demografiko propioa duela ondorioztatu dute teknikoek, ugalkortasun gaitasuna eta endogenotasuna ezaugarri hartuta.
Biztanleriaren, etxebizitzen egoeraren eta Herrigune Historikoan erretratua egiteko, iraganetik hasi dira. Hamarkada batzuk atzera egin eta gaur egunera izandako bilakaerari buruzko datu asko ditu txostenak. Gislan enpresakoak harago joan dira, eta etorkizunean zer egin daitezkeen esan dute.
Txostena mardula da eta datu eta ondorio asko ditu. Herriguneko merkataritza txikiaren eta etxebizitzen egoera, emantzipazioa, biztanleriaren zahartze prozesua, bizikidetza-unitateak, hutsik dauden etxe kopurua, alokairu portzentaje txikia….
Udal arduradunek txostena sakon aztertuko dute, emaitza horiekin, etorkizunean egin daitezkeen aktuazioak zeintzuk diren erabaki aurretik. Epe motzera batzuk eta luzera beste batzuk.
