Anfibioen erakusketarekin hasiko dira aurtengo ingurumen jardunaldiak

Oñatin atzemandako basoko txantxiku gorria. (Argazkia: Jon Garin)

Animaliak, lurrazala eta klima izango dira aurtengo ingurumen jardunaldietako ardatza, eta erakusketak, hitzaldiak, irteera eta film emanaldiak antolatu dituzte, besteak beste, datorren astelehenetik martxoaren 20ra bitartean. Oñatiko Natura Eskolak antolatu ditu aurten ere ingurumen jardunaldiak.

Oñatiko Udaleko ingurumen sailak emandako beka bati esker, herriko anfibio eta narrastien inguruko lana egiten ari dira Aranzadiko bi gazte, eta, hala, animalia horien inguruko ekitaldiak dira antolatu dituztenetako batzuk. "Erakusketa bat egongo da kultura etxean, anfibioen ingurukoa, eta asmoa da herriko ikastetxeekin bisita gidatuak egitea. Bestalde, Aurreko mendira, Sarramendi inguruan dauden putzu batzuetara irteera egingo dugu, anfibioen arrautzak eta larbak ikusteko eta bereizteko. Narrastien gaineko irteera aurrerago egingo dugu, beroa behar dute-eta haiek", adierazi du Natura Eskolako Imanol Biainek. Irteera horietan Jon Garin izango dute lagun, ikerketa egiten ari den gazteetako bat. "Anfibio gehienak udaberrian ugaltzen diren arren, espezie batzuek aurreratu eta neguan jada erruteak ezartzen dituzte, baso igel gorriak kasu. Espezie honen banaketa-area mugatzearekin batera, txantxiku arruntaren zapaburu hibernatuak topatzen ari gara", adierazi du Garinek.

Oilagorrak

Ehiztarien artean hain preziatua den oilagorrari buruzko hitzaldi bat ere izango da. "Hegazti horien migrazioaren datuak ezagutuko ditugu, satelite bidez egin zaien jarraipenaren emaitza, alegia. Badakigu, adibidez, Siberiaraino joaten direla umatzera eta hurrengo urtean berriz toki berera bueltatzen direla negua pasatzera", dio Biainek.

Parisen egindako klima aldaketaren inguruko goi mailako bilerak utzitako ondorioei buruz ere jardungo dute, eta baita azaleramendu geologikoaren gainean ere. Kultura etxean izango dira hitzaldi guztiak. Bestalde, urtero egin ohi diren bi zuhaitz landaketak eta azoka ere egingo dira aurten.

Anfibioak eta narrastiak ikusteko irteeraz gain, Gesaltza Añanara joateko bidaia ere antolatu dute. Joan gura duenak izena eman behar du aurretik, autobusa zenbat lagundako hartu jakiteko. Izena Natura Eskolara deituta egin daiteke. Telefono zenbakia, hauxe: 943 71 64 04.

Egitarau osoa agendan duzue.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.