"Iparragirre Oñatin" antzezlanaren arrakastaren ostean, liburua kaleratu dute orain

Iazko San Migeletan Santa Ana aretoan taularatu zuten izen bereko antzezlana, eta orain horren liburua kaleratu du Inazio Irizarrek, Olaitturri kultur elkarteko presidenteak. Atzo, irailak 23, egin zuen aurkezpena kultur etxean, Joxe Mari Anduaga abeslari eta gitarra jolearen laguntzaz. Gainera, bertan aurreratu zuen abenduaren 5ean antzerkiaren beste emanaldi bat egingo dutela.

Aurkezpenean liburuaren zein antzezlanaren proiektuaren sorrera eta garapena azaldu zituen Irizarrek, eta Anduagak Iparragirreren lau kantu abestu zituen gitarraren laguntzaz.

Jose Maria Iparragirre bertsolari urretxuarraren bizitza kontatzen du istorioak, atzerrian izan zeneko garaia eta Oñati herriarekin izandako loturan sakonduz bereziki. Besteak beste, Oñatiko San Migel jaietan izaten ziren pilota partiduak aipatzen dira lanean, urretxuarrak kirol horrekiko zuen zaletasuna erakutsiz.

Liburuaren atalak

Hiru zati nagusi ditu Iparragirre Oñatin liburuak. Lehendabizi, obrari buruzko azalpenak batzen dira bertan, baita berau aurrera eramateko prozesu guztiari buruzkoak ere. Horren ostean, antzerkiaren testua dator, oso-osorik. Eta, bukatzeko, Iparragirrek idatzitako hamalau kanturen partiturak. "Antzezlanarekin jendea pozik geratu zen, eta espero liburua ere gustatzea" adierazi du idazle oñatiarrak.

Inazio Irizarren hemezortzigarren liburua da honakoa. Aurrez ere publikatu ditu herrigintzari lotutako beste hainbat; hala nola, Oñatiko historia eta arte bilduma (1987), Oñatiko Korpus eguna (1987) edota Anexiñua oñatiarrez (2002). Azkenengoz Olaitturriren herri antzerkia publikatu zuen Jerardo Elortzarekin batera, 2010. urtean hain zuzen.

Talde lanean egina

Irizar autoreak nabarmendu du kaleratu berri duen liburu hori ez dela bakarkako lana izan, eta aurkezpenean eskerrak eman zizkien liburuan zein antzezlanean parte hartu duten guztiei: "Olaitturrin beti koadrila handia ibiltzen gara", dio.

Oraingo honetan, gainera, elkarteko kide diren aktoreez gain, herriko hainbat abeslarik ere parte hartu dute proiektuan. Besteak beste, Azpiazu Musika Eskolakoek, Oñati Abesbatzekoek, Parrokiako Korukoek, Ganbara Abesbatzekoek eta Bertso Eskolakoek lagundu diete Olaitturrikoei antzezlanarekin.

Antzerkia abenduan

2014ko San Migel jaietan antzezlana lehen aldiz taularatu zutenean, bi pase egin zituzten, eta guztira 550 ikusle bildu ziren Santa Ana aretoan.

Estreinaldi hartan obrak harrera ona izan zuen herritarren partetik, Iñazio Irizarrek azaldu duenez: "Sarrerak bi egunetan agortu ziren, eta lekurik lortu ez zuen jende asko penaz geratu zen". Hori dela eta, abenduaren 5ean, zapatua, emanaldia berriro ere egitea erabaki dute Olaitturri elkartetik. "Aurten San Migeletan jai hartu dugu, pixka bat deskantsatzeko", azaldu du Irizarrek.

Abenduaren 5eko antzerki horretarako sarrerak Txokolateixan daude salgai. Bost euroren truke, antzezlanerako sarrera eta liburua eskuratzeko aukera egongo da bertan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.