"Konturatu ginen herriko ostalaritzan eta merkataritzan jartzen ziren errotulazio edo ohar asko gaztelera hutsean zeudela eta menuak ere hala zeudela", adierazi du Nerea Zubiak, Euskara zinegotziak. Hain zuzen, Udaleko Euskara Zerbitzuak herriko jatetxe eta tabernetako menuak, ogitartekoak eta pintxoak iragartzeko erabiltzen diren euskarriak aztertu ditu eta emaitzak honako hauek izan direla azaldu du Zubiak: "Menuaren kartela kanpoan duten establezimenduen %70ek dute gaztelera hutsean eta barruan dagoen pintxo zein menu eskaintzaren%35ek". Bestalde, beste datu bat ere nabarmendu nahi izan du zinegotziak: "Oñatiko biztanleriaren %80tik gorak daki euskaraz".
Harrera ona
Ostalarien aldetik kanpainak harrera ona izan duela dio Udaleko ordezkariak. "Begi onez ikusi dute. Azken batean, laguntza eskaintza bat izan da". Zehazki, Udaleko Euskara Zerbitzutik testuak itzultzeko, zuzentzeko edo zalantzak argitzeko laguntza eskaini zaie ostalariei. Kanpainan hamabost jatetxe eta tabernak eman dute izena, baina oraindik ere har daiteke parte.
Erabilera sustatu
Zubiak esan du, baina, kartelak aldatzearena lehen urratsa izan dela. "Bezeroak eurak euskaraz eskatzera bultzatu nahi ditugu". Hala, kanpainan parte hartzen duten establezimenduetan euskaraz eskatzen duten bezeroen artean bi lagunentzako afaria zozketatuko da eta saria eman duen establezimenduak ere sari bat jasoko du.
Bestalde, udan herrira etorriko diren turistek euskarazko paisaia linguistikoa ikustea ere garrantzitsua dela ere badio Zubiak. "Kanpotarrek beste hizkuntza bat dugula ikustea garrantzitsua da; ez da herritarrentzako bakarrik". Hain zuzen, horregatik erabaki dute abuztu bukaerara arte luzatzea kanpaina. Irailetik aurrera, bestalde, beste fase bati ekingo diote merkatariekin.
