ALOÑAKO X. IGOERA: Ionut Zinca eta Ana Conde azkarrenak

Goiatz Arana Begiristain 2014ko mai. 4a, 16:15
Bi ordu eta lau segundo behar izan ditu gizonezko azkarrenak; eta bi ordu, 31 minutu eta 57 segundo, lehen emakumezkoak. Debagoiendarren artetik denbora onena egin dutenak, berriz, Iñigo Alzola arrasatearra (02:13:22) eta Maite Zabaleta oñatiarra (03:06:59) izan dira. Hamargarren edizioan ibilbide berria estreinatu dute lasterkariek, eta asko gustatu zaie, orain artekoa baino gehiago. Ez da hori izan, urteurrenaren bereizgarri bakarra, ordea: hamargarrenean, asteburu osoko festa bihurtu da Aloñako Igoera.

Ionut Zincak egin du X. Aloñako Igoeran denborarik onena (02:00:04); Imanol Goñi izan da bigarren azkarrena gizonezkoetan (02:00:39); eta Jokin Lizeaga, hirugarrena (02:02:58). Parekatuta joan dira oso lehen biak ia ibilbide osoan, lasterketaren azken txanpan Zincak aurre hartu duen arte. Bera izan da garaile, baina 35 segundo gehiagorekin aski izan du Goñik ere helmugan sartzeko.

Zincaren eta Goñiren taldeak izan dira, gainera –Sestao Alpino eta Arratzuko Arrolape, hurrenez hurren– kluben artekoan lehen eta bigarren postuak lortu dituztenak.

Lehen debagoiendarra Iñigo Alzola izan da, bi ordu, 13 minutu eta 22 segundoko denbora eginda; sailkapen nagusian zortzigarren geratu da.

Emakumezkoei dagokienean, Ana Condek egin du denborarik onena (02:31:57); Alizia Olazabal geratu da bigarren (02:51:40); eta Andrea Gilentzat izan da hirugarren postua (02:53:13). Faboritoa zen Conde eta hasieratik bukaerara arte nagusitu da, 20 minutuko eta hortik gorako tartea ateraz gainontzeko emakumezkoei.

Debagoieneko emakumezko azkarrena Oñatiko Maite Zabaleta izan da (03:06:59); zortzigarren geratu da sailkapen orokorrean.

342 dortsal banatu dituzte guztira lasterketa hasieran.

Ibilbide berria, "arrakastatsua"

Lasterkariek ibilbide berria estreinatu dute hamargarren edizioan eta asko gustatu zaiela aitortu dute, beste urteetakoa baino gehiago. Aurreko egunetan ez bezala, eguraldi aparta egin du gaur, gainera, eta horrek ere lagundu die, noski, lasterketaz gozatzen. Arrazoi hori tarteko baita ere, jende ugari batu da Oñati eta Aloña arteko maldetan, korrikalariak animatzeko.

Omenaldiak

Baina ibilbide berria ez da izan aurtengo igoeraren berezitasun bakarra. Izan ere, lasterketari ekin aurretik, omenaldia eskaini diete edizio guztietan parte hartu duten zazpi lasterkariei; eta esker ekitaldia jaso du Iban Isastik ere, hamarkada osoan, hutsik egin barik, antolatzaile lanetan jardun izanagatik. Zorionak kantua ere abestu diote.

Gaurkotik haratago, asteburu osoa izan da berezia, ordea: bariku iluntzetik hasita, kirol proba bereziak eta familia osoari zuzendutako ekitaldiak izan dira Oñatin nahiz Arantzazun.

Ikusteke dago orain, datorren urtean jarraipenik izango ote duen.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak