Hasi dira Leintz Gatzagako andramaixak, eta egun potoloa izan zen atzokoa jaiei behar bezalako hasiera berezia emateko. Dorleta Txirrindularitza taldeak eman zuen jaiak hasteko pregoia, eta behin festa hasita, ginkana, triki-pintxo-poteoa, bola txapelketa eta Izorrai, Ateri, Aingura eta Lepue Zapaldu taldeen kontzertuak egin zituzten.
Dorleta Txirrindularitza taldeko kide Joxerra Agirreurretak eta Alberto Altunak hartu zuten hitza pregoian, eta txirrindularitzak Leintz Gatzagan duen indarraz hitz egin zuten: "Uste dut herriak daukan gauza garrantzitsu bat dela txirrindularitza, eta hori uztailean denok ikusi genuen Dorletako Ama Sari Nagusiak utzitakoarekin. Orain lasterketa antolatzeko ardura gazteei utziko diegu, baina gu ere inguruan egongo gara".
Bola txapelketa
Atzo gauean jokatu zuten jaietako bola txapelketa herriko bolatokian. Guztira 51 parte hartzaile izan zituen, eta lehen lau bolariek txirlo kopuru berdina jo ondoren —sei txirlo—, berdinketa hausteko azken bi bolo bota zuen bakoitzak. Bi bola gehigarrietan Jesus Mari Gorosabelek bota zituen txirlo gehien, eta Sebas Aranzabalentzat eta Igor Ayastuirentzat izan ziren bigarren eta hirugarren postuak. Hemen sailkapena: