Leintz Gatzagako andramaixetarako bigantxen saioa berreskuratzeko hautua egin zuten iazko jaietan, herritarren artean egindako galdeketa baten proposamen hori jaso eta gero. Bada, udal ordezkariek adierazi dutenez, "iazko jaietako ekintza potenteena" izan zen hura, eta "herritarrak oso gustura" aritu ziren zezenaren aurrean zein hesien atzetik saioa ikusten. Hala, aurtengo andramaixei begira, berriro ere galdetzeko beharrik izan gabe, egitarauan sartzea erabaki dute.
Zapatuan izango da bigantxen hitzordua, 18:30ean, Herriko Plazan. "Iaztik hona, aldaketa bakarra ordutegia da; izan ere, ez dugu nahi mus eta briska txapelketekin batera izatea", adierazi du Leintz Gatzagako Udalak.
Adin muga
Aurten ere Bergarako Zezenak ganadutegiaren eskutik antolatu dute bigantxen saioa Gatzagan. Udal ordezkariek diote espero dutela "herritar asko joatea Herriko Plazako saiora eta Iñigo Almortzak zezenaren aurrean jartzen direnak etengabe animatzea". Bestalde, Udalak gogorarazi du plaza ingurua hesituta egongo dela eta 16 urtetik beherakoek debekatuta izango dutela bigantxetan parte hartzea.