Urteroko hitzordu garrantzitsuenak ere izango du tokia aurtengo egitarauan: danborradak. San Pedro egunaren bezperan, hilaren 28an, irtengo dira batailoiak kalera, 22:30ean, eta iazko ibilbide bera egingo dute. Ekainaren hasieran ekin zieten entseguei, eta azken asteetan izango dira "entsegu garrantzitsuenak", Andoni Moto danborradako zuzendari orokorrak dioenez. Hilaren 27an egingo dute entsegu orokorra, "hurrengo egunerako guztia prest uzteko".
Inoizko jendetsuena
Zortzi batailoi irtengo dira zapatuko danborradan, eta iazko pieza berberak interpretatuko dituzte; Dorleta elkartea, Euskal Giroa, Elizoste, Gu Geu, Irrintzi, Eguzkilore, San Pedro Txiki eta Elkartasuna talde gaztea dira danborrak astintzera irtengo diren batailoiak; betiere, musika bandak lagunduta. Guztira, 330 danbor-jole arituko dira Eskoriatzako kaleetan. Motoren hitzetan, "errekor guztiak hautsi dituen zifra" da aurtengoa –aurreko errekorra 248 partai- dekoa zen–. Elkartasuna talde gaztea izaten da urtero-urtero jende gehien batzen duen batailoia, eta aurten euren taldea osatzen duen kopurua ere handitu egin da, nabarmen, Motok adierazi duenez: "Iazko danborradan 150 lagun inguruk osatu zuten taldea –ez zen 150 pertsonara iristen–; aurten, berriz, 220 eskoriatzar daude talde horretan, eta bereziki pozten gaituen kontu bat da, noski".
Haurren danborrada
Haurrak ere irtengo dira Eskoriatzako kaleetara danborra jotzera, baina euren txanda hilaren 30ean izango da. 12:00etan hasita, kiroldegitik abiatuko dira, kalez kale, plazara iritsi arte; haurrek ere iazko pieza berberak joko dituzte. Iaz 106 haur irten ziren danborradan, eta aurten ere "kopuru antzekoa" mantenduko dela adierazi du antolatzaile batek, Arantxa Unzuetak. "Azken urteetan geroz eta ume txikiagoek" hartzen dutela parte aitortu du, "helduagoak konbentzitzea zailagoa" dela iritzita; hala ere, antolatzaileak "pozik" daude egindakoarekin.
