Badiardugu elkartekoak aritu dira lana egiten, eta Ahotsak.eus, Euskal Herriko hizkerak eta ahozko ondarearen gaineko webgunean artxibatu dute elkarrizketa-sorta, hurrengo belaunaldiek, Eskoriatzako sanjoanetako ohiturak jakin ditzaten.
Herriko ondarea jasota
Haizea Odria, Badihardugu elkarteko kidea aritu da grabaketa lanak egiten, eta, "zoragarri" aritu dela adierazi du: "Denek ateko etxeak ireki didate parez-pare, merendatzen ere eman didate, eta denak oso prest gauzak kontatzeko gogoz. Elizate batetik bestera, eta etxez-etxe ezberdintasunak daudela ohartu gara grabaketetan. Esaterako, lore-sorta bedeinkatzera eramaten zuten batzuk, beste batzuk ez…".
Antzokia beteta izan zen, eta herritarrei gustatutako lana izateaz batera, Eskoriatzako Udaletik ere gustura geratu dira emaitzarekin. Hala adierazi zuen Joserra Zubizarreta Eskoriatzako alkateak: "Garrantzitsuena, garai bateko ohiturak batzea da, eta eskertzeko da kontatzeko prest egon diren horien lana, zein grabatzen aritu direnena".
Zazpi herritarren testigantzak
Lekukotasuna eman duten herritarrak Guadalupe Atxaga, Jose Ramon Okaranza, Iñaki Madinabeitia, Juan Felix Iregi, Aintzane Ortiz de Zarate, Jon Apraiz eta Saioa Uribe izan dira, eta atzoko ekitaldia guzti horiei eskerrak emateko ere baliatu zen.
Testigantzak eman zituztenak pozik agertu ziren lanean parte hartzeko izan duten aukerarengatik, eta beraiek dokumentalean adierazi zituzten ohiturez gain, ezagutzen ez zituztenen hainbaten berri izateko ere aukera izan dutela adierazi zuten.
Ekitaldia amaitzeko, testigantzak eskaini zituzten herritarrak oholtzara igo zituzten, eskertza moduan, txalo beroa jasotzeko, eta dokumentalaren kopia bana ere jaso zuten ekitaldian.
