Hainbat urte pasa dira Eskoriatzako Jose Arana nagusien egoitzako lanak hasi zituztela. Bidea luzea izan da, baina forma hartzen ari da Gipuzkoako Diputazioarekin eta Eskoriatzako Udalarekin elkarlanean Eskoriatzako Jose Arana nagusien egoitzako patronatuak eraikina berritzeko proiektua.
Hiru fase batzen dira proiektu horretan, eta, horiek eginda –hirugarreneko hainbat faltan–, fatxadako lanekin hasi dira. Aurreikuspenen arabera, urtebete iraungo dute.
Goitik beherako lanak, amaitzen
Lehenengo fasean, eraikin zaharreko goiko solairuan banakako lau gela berri jarri zituzten, hiru komunekin, eta, horietako bat partekatuta, terraza egokitu eta igogailu berria jarri zuten. Bigarren fasean, aldiz, beheko solairua egokitu zuten. Irisgarritasuna bermatzeko, espazioak zabalduz, eta bertan, terapia gela, jangela eta egongela handi bat egokitu eta komunak jarri zituzten.
Hirugarren fasean murgilduta
Iazko udan, 2018an, hirugarren faseari dagokionez, egongela eta komunen berrikuntza eta hobekuntzak amaitu zituzten. Hala ere, oraindik hirugarren fasea amaitzeko honako lan hauek geratzen zaizkiela adierazi du Mireia Larrañagak, Jose Arana nagusien egoitzako zuzendariak: "Hiru bulegotan – erizain, sendagile eta zuzendaria– zoru berria jarri eta margotu egingo dute; zentzumen gela, sala sentsoriala, lehenengo solairuko biltegia eta bilera gela sortu eta egokitu egingo dituzte; eta emergentziazko ateak jarriko dituzte".
Honekin batera, fatxadako lanak ere egiten ari dira. Nagusien egoitza zaharreko eraikineko alde guztietan egingo dituzte lanak, baina aurrealdetik hasi dira, han daudelako uriragazte edo filtrazio handienak. "Eskailera eta fatxadaren materialen konposizioagatik, hezetasun filtrazioak daude egoitzan. Obrak fatxadaren aurrealdetik hasi ditugu, hezetasunarengatik kaltetuen dagoen aldea delako, eta kanpoko eskaileretatik, berritutako beheko solairuko pasilloan filtratutako hezetasuna kentzea, ezabatzea edo deuseztatzea da lehenbizi egin nahi duguna", adierazi du Larrañagak.
Fatxadaren %50, Diputazioak
Azken fase honetako aurrekontuari dagokionez, hau da, fatxadaren aurrekontua, 142.000 euro da, eta Gipuzkoako Diputaziotik jaso duten dirulaguntza, berriz, 85.200 euro.