Ekimenaren helburua da kalez kale, herriko eragileen parte-hartzearekin, euskarari bultzada herrikoia ematea. Martxoaren 23an pasatuko da 19. Korrika Eskoriatzatik, eta herritarrei Korrika badatorrela ohartarazteko antolatu dute.
Hasiera batean, Eskoriatzako Intxaurtxueta auzoko biribilgunera soilik iritsi behar zuen Korrika ofizialak, eta, hainbat saiakeraren ondoren, erdiguneko biribilguneraino heltzea lortu dute bi ekimenek. Hori gutxi iruditu zaie Eskoriatzako Ixotu Euskarako eta gaztelekuko Gazte Taldeko antolatzaileei, eta, horregatik, herri osoa zeharkatuko duen Korrika Txikia prestatu dute martxoaren 20rako. Korrika ofiziala imitatzeko asmoz, ibilbidean testigua eramateko prest dauden elkarte eta herritarrei gonbidapena egin diete antolatzaileek, eta herriko elkarte gehienak animatu dira parte hartzera.
Postaka-ren ibilbidea Intxaurtxueta auzoan hasiko da, eta goiko kalean buelta eman ondoren, bukaera herriko plazan izango da. Hasi aurretik, 17:00etan, musikaz girotutako umeendako jolasak egongo dira plazan, ekimena girotzeko asmoz.
Postaka amaitzean, atxikimendu-mezua irakurriko dute eta musika emanaldia izango da, Hankamotx bertso eskolakoen eskutik bertsoak, txistularien laguntzaz kantu saioa… Hori guztia egiten den bitartean, Axtroki merkatari elkartearen tabernetan pintxo-potea egongo da.
Pintxo-potea egubakoitzera
Ekimen hori martxoaren 20an, egubakoitza, izango da. Izan ere, Postaka-ko antolatzaileek merkatari elkartearekin hitz egin dute pintxo-pote eguna eguenetik egubakoitzera aldatzeko, giro ederra egon dadin herrian.
Komunikazio tailerra
Domekarako, hilak 15, herria apaintzeko komunikazio tailerra antolatu du gaztelekuak, Korrika datorrela eta. Martxoaren 23an egin beharrekoez hitz egingo dute herriko gazteek. Gaztelekuan bertan izango da, 17:00etan.
