Zaborra batzeko gaikako ontziak jartzen hasi dira Eskoriatzan

Mirian Biteri 2013ko mai. 17a, 13:43

Kaleko hondakinak jasotzeko gaikako zakarrontziak jartzen hasi dira asteon Eskoriatzan. Udal brigadako langileak Olaeta plazan eta Aranburuzabala kalean martitzenean hasi ziren herriko kaleetan gaur egun sakabanatuta dauden 160 zakarrontziak kentzen. Horiek garbitu eta konpondu ostean, margotzera bidaltzen ere hasi dira; hondakinak gaika batu ahal izateko egokitu behar dira-eta. Denera, 96 zakarrontzi koloretsu ipiniko dituzte, herriko 24 lekutan launaka jarriko dituztenak.

Hain justu ere, horiz margotutako zakarrontzia ontzi arinendako izango da; urdina, paper eta kartoiendako; marroia, organikoarendako; eta grisa errefusarendako.

Hirigintza zerbitzuko udal langile Elisabeth Jauregik jakinarazi digu ekaina bukaerarako gura dituztela zakarrontzi guztiak egokitzea eta puntu berrietan jarrita izatea. Horren harira, azaldu du Udalak plangintza egin duela zakarrontziak aldatzeko modua "arrazoizkoa" izan dadin, eta kaleak, denbora luzez, zakarrontzi barik egon ez daitezen. Hori kontuan izanda, brigadako kideak "poliki-poliki" dabiltza zakarrontziak kentzen, eta horiek, egokitu ostean, ostera dabiltzala kalean jartzen. Horrekin batera, Jauregik gaineratu du parke gune eta plaza bezalako tokietan zakarrontziak egunero erabiltzen direla, eta hortaz, ingurune horiek ez direla zaborra botatzeko toki barik geratuko.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak