Atzo abiatu zen 23. Korrika, Irundik, eta eguazten goizean helduko da Elgetara. Jalotza parean hartuko dute lekukoa elgetarrek, 08:30ean. Elgetako Korrika batzordea lanean da urtarrila ezkero. Gaur arratsalderako antolatuta dauden ekintzetan parte hartzeko dei egin diete elgetarrei.
Eskolako ikasleek, irakasleek eta familiek Korrika Txikia egingo dute, 15:00etan. Plazan amaituko dute ibilbidea, 16:00etan. Batzordeak informazioa emateko eta banderatxoak saltzeko mahaia jarriko du ordurako. Eguaztenean lekukoa eramatekoak diren eragileek bertan jaso dezakete materiala.
Liburutegiko ipuinak (17:30ean), erretiratuendako txistor-jana Ozkarbin (18:00etan), Korrikaren aldeko argazkia (19:15ean) eta Eskoriatzako Ad Libitum txaranga (19:15ean) daude iragarrita Korrika Kulturala girotzeko.
