Herritar baten ahotik jasoko dituzte seme-alaben zibersegurtasuna bermatzeko aholkuak elgetarrek. Mondragon Unibertsitateko Datuen Analisia eta Zibersegurtasuna ikerketa taldeko ikerlaria da Enaitz Ezpeleta Gallastegi, eta hitzaldi irekia bada ere gurasoei bereziki bideratutakoa izango da. Ziberseguru jokatzeko aholkuak emango ditu Ezpeletak, 18:00etan hasiko den saioan.
Elgetako liburutegiak dinamizatuta udaberrian sortu zen Heziketa Digitala talde eragilea herrian. "Gaia plazaratzen jarraitu eta hausnarketarako bideak zabaldu asmoz antolatu dugu Interneteko arriskuak eta ziberseguru jokatzeko aholkuak hitzaldia", azaldu dute.
Liburutegian izango da hitzaldia, eta aurrez izena eman beharrik ez badago ere ludoteka zerbitzua behar dutenek eskatu egin behar dute beranduenez astelehenean, hilak 16.