Azken konfirmazioen zain Sebastian Arantzabal, Pili Arin eta kontsumo taldeko Iñigo Gabilondo plazan izango dira bihar. Herriko baratze parkeko ordezkariek osatuko dute barazkien eta fruten eskaintza.
Bestelako produktuak ere izango dira. Marokoar gozoekin jarriko dute postu bana Mahomed el Houmanik eta Omar Bitibik. Seigarren mailako ikasleek ere salmenta mahaia jarriko dute eta Baobeer garagardoa eskuratzeko aukera ere izango da.
Artisauen atalean, berriz, Pili Arin, Camila Andrea Diaz, Mohamed el Houmani eta Maita Barrainkua izango dira azokan.
Urte zaila orturako
Iaz barazki ederrak izan zituzten azokan herriko baserritarrek. "Eguraldia tarteko, aurten konplikatua izan da; sikutea, uholdeak, bero handia... Produktu gehienei eragin die. Tomaterako urte eskasa izan da. Sagarra da gehien dagoena", azaldu du Sebastian Arantzabalek.
Askotariko eskaintza
Azokara adin guztietako publikoa gerturatzeko aurten ere tirolina eta Intxortako igoera ere izango dira. Eguerdian upela irekiko da eta trikitilariak ibiliko dira kalez kale azoka eguna girotzen.
