Zapatu arratsaldean zartagin artean ibiliko dira elgetarrak. Patata tortilla lehiaketa 18:00etan hasiko da. Mendizaleen plazan jokatuko da eta Oiharte sagardotegiko upela ere egongo da. Bestetik, Elgoibarko Mauxitxa txarangak girotu du festa.
Udazken jaiaren barruan kokatzen den ekitaldia da. Batera aritu dira antolaketan, aurten, Goibeko Euskaltzaleen Elkartea, Gazte Asanblada eta Udala. Herritarrak lehiaketan parte hartzera gonbidatu dituzte.
Iaz berreskuratu zuen txapelketa Goibekok, eta 24 taldek eman zuten izena. Saria jasoko dute, aurten ere, tortilla goxoenak, originalenak eta baita azken sailkatuak ere.
Iazko irabazleei beraien sekretuaren inguruan galdetuta, zera azaldu du Gorka Arizmendiarrietak: "Ez dago sekreturik, benetan. Olioa, patata, tipula, arrautzak... Den-dena maitasunarekin erabili eta kito". Gomendioa ere eman du: "Zartaginaren ondoan egon adi-adi arreta galdu barik eta irabazle seguru".
Patata tortilla txapelketarako izen-ematea zabalik da Haizea eta Lola tabernetan zein udaletxean eta liburutegian. Sari banaketa 19:30erako iragarri dute.
Arratsalde osoan zehar Haurren aurrean helduok heldu kanpainaren inguruko informazioa ere banatuko dute.
