Urriaren 7an ekin zieten energia komunitatea sortzeko lan bilerei Elgetan. Batzar jendetsua izan zen, eta ordutik beste lau ere egin dituzte. Aztertu eta landu dituzte energia berriztagarrien komunitateen egungo eredua alternatiba gisa, merkatu elektrikoaren funtzionamendua, dauden diru-laguntzak, arlo juridikoa eta administratiboa, beste herri batzuetako esperientziak (Otxandio, Lea Artibai, Hernani, Bergara, Elorrio...). "Batzen gaituzten ideiak eta kezkak lantzearekin hasi genuen bidea, gure helburu bezala definitu genuelarik herrian energia berriztagarri, garbi eta seguruetan oinarritutako proiektuak gauzatuz, emisio kutsakorrak murriztu eta energetikoki burujabea izango den Elgeta bat eraikitzea", azaldu dute. Ordutik, hiru lan talde ere osatu dituzte lanketa egiteko.
Kooperatiba izaera
Kooperatiba izaerako energia komunitatea sortu nahi dute Elgetan. Kooperatibaren lehenengo proiektua frontoiko teilatuan komunitateko kideek "erabiliko" duten instalazio fotoboltaikoa jartzea izango da. "Horrez gain, energiaren inguruan kontzientziazio lanak eta bestelako proiektuak ere jorratuko dira. Elgetako Energia Komunitatea osatzeko bide honetan ekarpena egin eta erabakietan parte hartzeko nahia daukaten herritarrak animatu nahi ditugu gurekin harremanetan jartzera", zehaztu dute.
Eguaztenean, hilak 14, elkartuko dira udaletxean, 18:30ean. Besteak beste, talde juridikoak estatutu proposamena eramango du batzar horretara, eta aldi berean frontoiko proiektuaren bideragarritasun ariketa ezberdinak aztertuko dituzte.
Informazioa eskura
Orain arte egindako lanketaren gaineko informazioa jasota dago udal webgunean eta interesatuendako sortuta dago ebkelgeta izeneko Telegram kanala. Lantaldearekin harremanetan jartzeko, berriz, info@ebkelgeta.eus helbidera idatzi daiteke.