Pagatzako estazio meteorologikoak jasotako datuen arabera atzo eguerdian jo zuen haizeak gogorren; 12:00etatik 17.00etara, hain zuzen ere. Haizeterik indartsuenak eguerdi partean izan ziren; haizearen indarra segundoko 18,90 metrokoa izatera heldu baitzen.
Horren ondorioz, hainbat zabor-edukiontzi mugitu ziren bere lekutik, eta asko izan ziren apurtu ziren zuhaitz enborrak eta adarrak. Horietako batzuek errepidera erori eta arazoak eragin zituzten. Esaterako, Torrezar parean eguerdi partean eroritako adarra edo 23:30ean bueltan Bergaratik Elgetarako GI-2632 errepidean –Dormicoop zenaren parean– jausitako enborra. Pertsianak eta loreontziak ere airean ibili zituen atzo haizeak. Hilerri inguruan eta San Roke osteko berdegunean ere eragin nabarmena izan zuten haize ufadek.
Gaur goizean adarrak eta enborrak erretiratzeko lanetan dihardu Udal Brigadak. Kiroldegiko haur parkean, esaterako, traban dagoen zuhaitz bat erretiratzeko lanetan dihardute. Asentzioko bidegurutzean lubaki gunean ere erorita dago beste enbor bat. Ez du zirkulazioan trabarik eragiten.
Haizeak indarra galduko du
Hego-mendebaldeko haizeak indarra galdu du gaur. Hala ere, Euskalmeten iragarpenaren arabera, oraindik, bolada gogorrekin ibil daiteke eta "enbarazu egin dezake; arratsaldearen erditik aurrera nabarmen ahulduko da".
