Otsailaren 2an, 36ko gerrako lau lehergailu aurkitu zituzten Intxorta 1937 kultur elkarteko kideek Karabietan. Abisua eman eta dagokion protokoloa martxan jarri ostean, kontrolpeko leherketak egin zituen Ertzaintzak. Ez da lehen aldia gerrako lehergailuak agertzen direla Elgetan.
Lehergailuak Indargabetzeko Unitateko komisario esan du "lasai asko" ibili daitekeela mendian, "normalean lur azpian egoten direlako". Elgetakoak ere lurpean zeuden, metro eta erdiko sakoneran, Arruabarrenak azaldu duenez. Horrelakorik aurkituz gero, dena den, 112 telefonora deitu behar da. "Eta ez dira ez ukitu, ez mugitu behar. Hermetikoki itxita egoten dira, eta ez badira zabaldu karga aktibo egoten da. Erruleta errusiarra da".
Azaldu du bildumatzaileak ibili ohi direla gerrako material bila, eta horrela aurkitzen dituztela lehergailuak. "Debekatuta dago jasotzea, eta legeak ez du uzten horrelakoak edukitzen; ez lehergailurik, ez piezarik". Horrelako lanetan ibiltzeko baimen bereziak behar direla ere esan du Arruabarrenak.
Aspaldikoak izanik ere eztanda egiteko gaitasuna dute oraindik ere lehergailu askok. "Arrazoiak hainbat izan daitezke: ez zirelako puntaz erori eta espoletak ez zuelako lurra jo, edo gaizki muntatu zirelako, edo espoletak akatsen bat zuelako… baina karga aktibo dago eta lehertu daiteke".