Aurreko urteetan protagonista izan dira, esaterako, gudariak eta milizianoak, emakume erresistenteak, biktima zibila… eta aurten gerrako umeak edo errefuxiatu behar izan zuten umeak ekarriko dira lehen lerrora.
Hainbat ekitaldi egingo dituzte, baina nagusia apirilaren 26an izango da. Ume boluntarioak behar dira egitekoa den antzezlan edo errekreazio baterako. Errefuxiatutako eta ebakuatutako umeak irudikatzeko, hain zuzen ere.
Adin guztietako neska-mutikoak behar dira. Hori da lehentasuna. Haurdun dauden emakumeak ere bai, egon baitziren. Eta nola ez idazkari, komisario politiko, mediku edo erizain lanak egingo dituzten helduak ere behar dira. Beraz, inor animatzen bada ongi etorria izango da.
"Neska-mutikoetako batzuk antzerkia ere egin beharko dute. Hau da, berba egin beharko dute. Aurkezten direnen artean egingo dute aukeraketa", adierazi du Intxortako 1937 kultur elkarteko Nerea Villak.
Izen-ematea zabalik da Elgetako udaletxean (943 76 80 22).
Informazioa osatzen laguntzeko eskaera
Bilaketa lan bat dago honen guztiaren atzean, eta laguntza eskatu dute Elgetatik. Inork ezagutuko balu haur errefuxiatua izandako debagoiendarrik, mesedez, jakinarazteko eskatu dute. Debagoieneko herri ia guztietan lokalizatu dute kasu bat gutxienez. Leintz Gatzagan eta Aretxabaletan, oraingoz, ez. Historia ofizialak alboratu egin ditu biktima hauek guztiak. Lista batzuk badaude, baina ez da nahikoa. Nerea Villak ematen digu honen berri.