Bihar, apirilak 23, Liburuen Nazioarteko Eguna dela-eta plazara aterako ditu gaur liburuak liburutegiko arduradun Geaxi Ezpeletak. 17:00etarako haurrendako jolasak iragarri ditu, eta 18:00etan liburu zozketa egingo du plazan.
Organo kontzertua
Bergarako organo ikasleek, berriz, kontzertua egingo dute Elgetako elizan, gaur, 19:00etan. Leo Jauristik, Pello Letek, Eugenio Etxebestek, Mikel Ansolak eta Lorea Larragañak joko dute organoa. Larrañaga Elgetan bizi da, eta bertako musika irakaslea da. Elgetako organo neogotikoa da eta Jose Amezuak egin zuen 1895. urtean.
Margolariak eta 'zumba'
Zapatuan, 10:00etan, bi orduko zumba saioa egingo dute Espaloia kafe antzokian. Prezioa da hamar euro, ikasleendako zortzi euro.
Ordu berean hasiko da Bergarako Beart elkarteak antolatutako SketchCrawl topaketa. Herriko txoko ikusgarrienak aukeratuko dituzte margolariek mihisea ipini eta margolanak egiteko. Amaitutakoan bazkaria egingo dute Rincon de Lola tabernan.
Domekan Herrixa Dantzan
Eta domekan dantza zaleek hitzordua dute Espaloian, 19:00etan. Ordu eta erdiko saioa gidatuko du Patxi Monterok.
